એક અનોખું ગામ! આ ગામમાં તમને એક પણ ઘર બે માળનું નહી જોવા મળે, જાણો આની પાછળનું એક રહસ્ય વિશે

આપણા દેશમાં ઘણી નવી અનોખી પરંપરાઓ ચાલી રહી છે. ખાસ કરીને ભારતના ગામડાઓમાં ઘણી વિવિધ પ્રકારની પ્રથાઓ ઓળખાય છે. ભારતની લગભગ બે તૃતીયાંશ વસ્તી ગામડાઓમાં રહે છે. કદાચ એટલે જ કહેવાય છે કે ભારતનો આત્મા ગામડામાં વસે છે. અહીંના દરેક ગામની એક અલગ વાર્તા છે. આજે અમે તમને એવા જ એક ગામની કહાની વિશે જણાવી રહ્યા છીએ જ્યાં આજે પણ લોકો પોતાના ઘરનો બીજો માળ બનાવતા ડરે છે.

આ ગામ રાજસ્થાનના ચુરુ જિલ્લાના સરદારશહર તાલુકાનું ઉદસર ગામ છે. છેલ્લા 700 વર્ષથી અહીં કોઈએ બહુમાળી કે બે માળનું મકાન બનાવ્યું નથી. અહીંના લોકોનું કહેવું છે કે 700 વર્ષ પહેલા આ ગામમાં આવી ઘટના બની હતી, જેના કારણે આ ગામને ક્યારેય બીજા માળની ઈમારત ન બનાવવાનો શ્રાપ મળ્યો હતો. તેઓ કહે છે કે જે ઘરનો બીજો માળ બનાવશે, તેના પરિવારને નુકસાન થશે.

કહેવાય છે કે 700 વર્ષ પહેલા આ ગામમાં ભોમિયા નામની વ્યક્તિ રહેતી હતી. ભોમિયા ગાય ભક્ત હતા અને નજીકના ગામ અસપાલસરમાં તેમના સાસરિયાં હતાં. એકવાર લૂંટારાઓ ભોમિયા ગામમાં આવ્યા અને તેઓએ ગાયો ચોરવાનું શરૂ કર્યું. જેના પર ભોમિયાએ લૂંટારુઓ સાથે અથડામણ કરી હતી. આ દરમિયાન ભોમિયાને ગંભીર ઈજા થઈ હતી. જે બાદ ભોમિયા દોડતો દોડતો તેના સાસરિયાંના ઘરે પહોંચ્યો હતો અને બીજા માળે જઈને ત્યાં સંતાઈ ગયો હતો.

જ્યારે લૂંટારુઓ ત્યાં પહોંચ્યા અને સાસરિયાઓને માર મારવા લાગ્યા અને ભોમિયા વિશે માહિતી માગી. આ અંગે સાસરિયાઓએ લૂંટારાઓને કહ્યું કે ભોમિયા બીજા માળે છુપાયો છે. જે બાદ લૂંટારાઓએ તેનું માથું કાપી નાખ્યું, પરંતુ ભોમિયા હાથમાં માથું રાખીને લડતો રહ્યો અને લડતા લડતા તે તેના ગામની સીમા પાસે પહોંચી ગયો.

આ દરમિયાન ભોમિયાનો છોકરો પણ યુદ્ધમાં લડતા શહીદ થયો હતો. બાદમાં ખડસર ગામમાં ભોમિયાનું ધડ પડ્યું હતું. જ્યાં ભોમિયાનું મંદિર બનાવવામાં આવ્યું હતું. દરમિયાન, ભોમિયાની પત્નીએ ગામમાં શ્રાપ આપ્યો કે આજથી કોઈ ઘરમાં બીજો માળ નહીં બાંધે. જે બીજા માળે બાંધશે, તેના પર આફત આવશે. પછી તેની પત્ની પોતે સતી થઈ ગઈ.

ગામના લોકોએ જણાવ્યું કે તે દિવસ પછી જેણે બે માળનું મકાન બનાવ્યું, તે ઘરની મહિલાનું મૃત્યુ થયું અને એકનો આખો પરિવાર નાશ પામ્યો. આ ડરના કારણે લોકો અહીં ક્યારેય બે માળનું મકાન નથી બનાવતા. આ ગામમાં શિક્ષિત લોકો પણ છે પરંતુ તેઓ પણ આ પરંપરાનું પાલન કરે છે. લોકો કહે છે કે તેઓ તેને અંધશ્રદ્ધા નથી માનતા. વર્ષોથી ચાલી આવતી આ પરંપરા છે, જેને તેઓ તોડવા માંગતા નથી. જો કે, આ ઘટના માટે કોઈ ઐતિહાસિક પુરાવા નથી.