પૂર્વ ધાકડ બેટસમેન યુવરાજ સિંહ બન્યા એક દીકરાના પિતા! ટ્વીટ દ્વારા ચાહકોને જણાવ્યું કે…

ભારતના પૂર્વ ઓલરાઉન્ડર યુવરાજ સિંહ પિતા બની ગયા છે. મંગળવારે તેની પત્ની હેઝલ કીચે પુત્રને જન્મ આપ્યો હતો. આ માહિતી યુવીએ પોતે સોશિયલ મીડિયા દ્વારા આપી હતી. યુવીએ પોતાની પોસ્ટમાં ભગવાનનો આભાર માન્યો છે. આ સાથે તેણે પોતાના ચાહકોને પ્રાઈવસીનું સન્માન કરવા વિનંતી કરી છે. યુવીએ વર્ષ 2016માં બોલિવૂડ એક્ટ્રેસ હેઝલ કીચ સાથે લગ્ન કર્યા હતા.

યુવરાજ સિંહે ટ્વિટર પર લખ્યું, “અમારા તમામ ચાહકો, કુટુંબીજનો અને મિત્રોને, અમને જણાવતા આનંદ થાય છે કે આજે ભગવાને અમને એક છોકરાનો આશીર્વાદ આપ્યો છે. અમને આ આશીર્વાદ આપવા બદલ અમે ભગવાનનો આભાર માનીએ છીએ. અમે ઈચ્છીએ છીએ કે તમે અમારી ગોપનીયતાનો આદર કરો કારણ કે અમે નાનાનું વિશ્વમાં સ્વાગત કરીએ છીએ. લવ, હેઝલ અને યુવરાજ.”

ભારતીય ટીમે પ્રથમ T20 વર્લ્ડ કપ (2007) અને ODI વર્લ્ડ કપ (2011) યુવરાજ સિંહના કારણે જીત્યો હતો. યુવીએ T20 વર્લ્ડ કપમાં ઈંગ્લેન્ડ સામે 14 બોલમાં 58 રનની ઈનિંગ રમી હતી. આ પછી આ સ્ટાર ઓલરાઉન્ડરે સેમીફાઈનલમાં ઓસ્ટ્રેલિયા સામે 30 બોલમાં 70 રન બનાવ્યા હતા. તે જ સમયે, યુવીને ODI વર્લ્ડ કપ 2011માં પ્લેયર ઓફ ધ ટુર્નામેન્ટ જાહેર કરવામાં આવ્યો હતો.

યુવરાજ સિંહ સફેદ બોલ ક્રિકેટના ખતરનાક ખેલાડીઓમાંથી એક છે. તેણે પોતાની કારકિર્દીમાં 304 ODI અને 58 T20 ઈન્ટરનેશનલ મેચ રમી છે. ODIમાં તેના 8701 રન અને 111 વિકેટ છે, જ્યારે T20 ઈન્ટરનેશનલમાં તેણે 1177 રન તેમજ 28 વિકેટ ઝડપી છે. યુવીને માત્ર 40 ટેસ્ટ મેચ રમવાની તક મળી. તેણે ટેસ્ટ કારકિર્દીમાં 1900 રન બનાવ્યા અને 9 વિકેટ લીધી.